خاندانی روایات سے کیا مراد ہے؟

روایات کسی بھی معاشرے کے بنیادی عناصر میں سے  ہیں اور اس کی شناخت کی وجہ بنتے  ہیں. یہ معاشرے کے طے شدہ نمونے ہیں جن کی چند مخصوص خصوصیات  اور علامات ہیں اور جو سال ہا سال سے معاشرے میں رائج ہیں اور یہ غیر مشروط اور لاشعوری طور پر زندگی کا حصہ بن جاتی ہیں۔  یہ معاشرے کو وہ اہمیت اور منفرد معیار عطا کرتی ہیں جو اس معاشرے کی پہچان بن جاتے ہیں۔ ثقافت، رسم ورواج ، اور روایات کسی بھی ملک کے لوگوں کے عقیدہ، تاریخ، ماحول اور زبان  کی نمائندگی کرتے ہیں۔

پاکستان کی ثقافت بہت متنوع ہے اور یہ ہمارے بھرپور ثقافتی ورثے اور روایات کی عکاسی کرتی ہے. اسی طرح سے ایک خاندان کی مخصوص ثقافت اور روایات  اس بات کی نشاندہی کرتی ہیں کہ انہوں نے اپنے بچوں کی تربیت کیسے کی ہے۔  مثال کے طور پر، سخت مذہبی ثقافت والے خاندان اپنے بچوں جدید اسکول کی تعلیم دینے کی بجائے  دینی تعلیم دینے کو ترجیح دیتے ہیں. وہ عموما اپنی لڑکیوں کو  یونیورسٹیوں میں نہیں بھیجتے  کیونکہ وہ مخلوط تعلیم کے خلاف  ہوتے ہیں۔

مختلف ثقافتی ماحول میں پرورش پانےوالے  بچے مختلف شخصیات کے حامل ہوتے  ہیں. بہت سخت یابہت نرم  خاندانی رسومات بچوں کو یا  تو بگاڑ دیتی ہیں  یا ان کو باغی بنا دیتی ہیں۔  ایسے میں والدین کو  خاندانی روایات کو برقرار رکھتے ہوئے  اپنے بچوں کو مناسب حد تک نرمی  کی اجازت دینا پڑتی ہے۔ یہ ضروری ہے کہ بچے اپنی روایات ، ثقافت  اور اقدار کو سمجھ لیں صرف اسی صورت میں وہ  ان روایات کو اگلی نسلوں تک منتقل کر سکتے ہیں۔